Programa de Doutoramento en Nanociencia e Biomedicina

Este programa busca a integración de dúas áreas de traballo inicialmente dispares e sen conexión como son os nanomateriais e a Biomedicina. A ciencia dos nanomateriais formou parte tradicionalmente da Química Física, con todo, nos últimos anos e debido principalmente ás diversas aplicacións que presenta determinouse a súa importancia no ámbito da biomedicina, xa que esta rama permite xerar e desenvolver novas aplicacións, sendo unha das áreas de investigación do Centro de investigación CINBIO. Grazas a este programa preséntase unha visión multidisciplinar, cun ambiente colaborativo onde teñen cabida diferentes liñas e áreas de investigación.

Este programa de doutoramento vén substituír ao que se imparte actualmente na Facultade de Química, Programa de Doutoramento en Ciencia e Tecnoloxía de Coloides e Interfases pola Universidade de Vigo, que acaba de recibir o informe favorable de Renovación da Acreditación (2020/2021). Este programa xa era a continuación do que se impartía co mesmo nome ata 2013 e que obtivo a Mención de Excelencia no curso 2010/2011, que, á súa vez, era a continuación do impartido ata o curso 2008/2009, que obtivera a Mención de Calidade por parte do MEC no curso 2003/2004.